سراب

الليلة عندي احساس غريب ... بالاسى ، بانو الحياة ما هي إلا ... سراب

من اول ما نفتّح عيوننا على هالدني ، اول شي منتعلمو هو البكي ، و منقضيها عم نبكي كل الباقي من حياتنا ، مع انو الاشكال بتختلف ، في منا بيبكي خيباته و فشله و البعض الآخر بيبكي احبابه اللي غادروه و مش قادر ينساهن بس ، بيبقى قسم اكبر بكتير من هول هو اللي بيبكي من هالدني ال .......( انتو عبّوا الفراغ باللي بتلاقوه مناسب ) ، دني ما عندها شغلة ولا عملي غير انها تنزّلوا لتحت ، و جرّب اقنعها اذا فيك انو هو مش طالب منها شي ، ما بدو ياها تساعدو و ما بدو تعطيه فرصة ، كل المطلوب منها انو تحل عن سماه شوي ، تنسى وجوده تخليه يعيش ،

يعيش متل ما هالعالم عايشة ، بحد ادنى من السلام .

لما نكون زغار ، منصير نتمنى و نحلم ، و الاحلام ما بتكون على قدنا ، و المشكل انو كل ما منكبر الاحلام عم تكبر معنا ، و المسافة كل ما هي عم بتصير أكبر عن الارض ، و نحن ..... آخر رواق مش حاسين باللي ممكن يصير و مش متوقعينه ، و فجأة ، بليلة ما في ضو قمر ، بتنضرب ضرب ما الها آخر ، بتحرق الدين تبعك و بتنزلك تحت سابع أرض ، و اول شي بتسأله ... ليش ؟؟؟ و الجواب هو دايما واحد : هششش ولا كلمة ، ما بعرف .

ما بعرف الله ليه بيخلق جوانح للواحد اذا مش رح يسمحلو يطير ، ليش بيخلقلنا عقل ، طالما كل ما فهمنا اكتر كل ما حياتنا تعقدت اكتر و اكتر أو .. انو هيدا هو القصاص !!

بعرف انو الحياة صعبة ، وانو لازم نكون اقوى منها و من الظروف ، بس كمان نحن بشر يعني منضعف و اوقات ممكن نستسلم ، ووقتها منكون خسرنا كل شي ، حتى حالنا ( قال منكون بعد ما فقدناها لهلق ) بس كمان بعرف اللي عم ياكل العصي مش متل اللي عم يعدها ، بس في شي مش لازم يغيب من بالنا ، انو الدني لو قد ما كانت بشعة ، الا ما فيها حدا يحبنا ( يعني على القليلة اهلنا ولو ) ، و برأيي أوّل شي لازم نفكر فيه لما تسود الدني بوجنا ، هو الاهل و الناس اللي بيحبونا ، لازم نفكر شو اللي ممكن يمرقوا فيه اذا نحن فلينا و خاصة اذا الرحيل كان .... مدوّي

اليوم ، عم بكتب الك ، لانك عن جد بتعنيلي ، و بحس انو ما بدي اخسر خي متلك ،

اوعك تشغلنا بالنا مرة تانية .......